அமெரிக்காவுக்கும் ஏனைய பல நாடுகளுக்கும் இடையிலான வர்த்தக யுத்தம் வெள்ளி (ஜூன் 1) ஆரம்பமாகிறது. அண்மையில் ரம்ப் அரசு ஐரோப்பிய நாடுகள், கனடா, மெக்ஸிகோ ஆகிய நாடுகள் உட்பட பல நாடுகளிலிருந்தான இரும்பு, அலுமினியம் போன்ற உலோகங்களுக்கு புதிதாக முறையே 25%, 10% இறக்குமதி வரி நடைமுறை செய்யவிருந்தது. பின்னர் அந்த தீர்மானம் ஜூன் 1 வரை இடை நிறுத்தி வைக்கப்பட்டு இருந்தது.
.

இடைநிறுத்தி வைக்கப்பட்ட காலம் இன்று வியாழன் சாமத்தில் முடிவடைவதாலும், இதுவரை ரம்ப் விரும்பியவாறு இணக்கங்கள் ஏற்படாததாலும், மேற்படி உலோகங்கள் மீதான அமெரிக்காவின் புதிய இறக்குமதி வரி வெள்ளிக்கிழமை நடைமுறைக்கு வருகிறது.
.

வெள்ளி வரவுள்ள புதிய வரிக்கு பதிலடி வரிகளை நடைமுறை செய்யவுள்ளதாக ஐரோப்பிய ஒன்றியம் கூறியுள்ளது. அமெரிக்க தயாரிப்புகளான Harley-Davidson மோட்டார்சைக்கிள், Levi jeans, whiskey, ஆரஞ்சு பழரசம் போன்ற பொருட்களுக்கு தமது பக்கத்தில் புதிய வரிகளை நடைமுறை செய்யவுள்ளன ஐரோப்பிய நாடுகள்.
.

ஜெர்மன் அதிபர் Merkel அமெரிக்காவின் இந்த நடவடிக்கை சட்டத்துக்கு முரணானது (unlawful) என்றும் உலக வர்த்தகத்தை பலமாக பாதிக்கும் என்றும் கூறியுள்ளார்.
.

மெக்ஸிகோ தாம் அமெரிக்காவில் இருந்து இறக்குமதி செய்யும் தகட்டு உலோகங்கள், இறைச்சி வகைகள், ஆப்பிள், திராட்சை போன்ற பொருள்களுக்கு புதிய இறக்குமதி வரிகள் நடைமுறை செய்யவுள்ளதாகவும் கூறுகிறது.
.

கனடாவும் அமெரிக்காவில் இருந்து பெறும் சில உலோகங்களுக்கு புதிய வரிகளை நடைமுறை செய்யவுள்ளது.
.